راولپنڈی ٹیسٹ میں پاکستان نے سری لنکا کو شدید دباؤ میں ڈال دیا، فتح کے لیے 7 وکٹیں درکار۔
فتح سے صرف 7 وکٹیں دور پاکستان! سری لنکا شدید دباؤ کا شکار، راولپنڈی ٹیسٹ فیصلہ کن مرحلے میں داخل۔
راولپنڈی (محمد زاہد خان) راولپنڈی میں پاکستان اور سری لنکا کے درمیان جاری دوسرے ٹیسٹ میچ میں قومی ٹیم نے اپنی گرفت مزید مضبوط کر لی ہے، جہاں دوسرے روز کے اختتام پر سری لنکن ٹیم اپنی دوسری اننگز میں 73 رنز کے مجموعی اسکور پر 3 وکٹیں گنوا چکی ہے، جبکہ اسے اننگز کی شکست سے بچنے کے لیے مزید 154 رنز درکار ہیں۔
پاکستان کو ٹیسٹ میچ میں شاندار فتح حاصل کرنے کے لیے اب صرف 7 وکٹیں درکار ہیں۔
دوسرے روز کھیل کے اختتام پر سری لنکا کی جانب سے دھاناجیا ڈی سلوا 24 رنز اور پسندو سوریا بندارا 18 رنز کے ساتھ کریز پر موجود تھے۔
سری لنکن بیٹنگ لائن کے نمایاں آؤٹ ہونے والے کھلاڑیوں میں کمنڈو مینڈس 16 رنز، لاہیرو اودارا 7 رنز جبکہ ڈینش چندی مل بغیر کوئی رن بنائے پویلین واپس لوٹ گئے۔
پاکستان کی جانب سے شاندار باؤلنگ کا مظاہرہ جاری رہا، جہاں ثاقب خان، رضا اللہ اور عامر جمال نے ایک، ایک وکٹ حاصل کرکے مہمان ٹیم کو شدید دباؤ میں رکھا۔
اس سے قبل پاکستان نے اپنی پہلی اننگز میں شاندار بیٹنگ کا مظاہرہ کرتے ہوئے 325 رنز کا مجموعہ ترتیب دیا اور سری لنکا کے خلاف 227 رنز کی فیصلہ کن برتری حاصل کی۔
پاکستان کی جانب سے غازی غوری 54 رنز کے ساتھ نمایاں بلے باز رہے، جبکہ اذان اویس نے 47، محمد طیب عارف نے 46، رضا اللہ نے 42 اور ثاقب خان نے 37 رنز کی اہم اننگز کھیلیں۔ سعود شکیل نے 24 اور سلمان علی آغا نے 21 رنز بنائے، جبکہ عامر جمال 12 رنز بنانے میں کامیاب رہے۔ بابر اعظم اور محمد طحہ نے 8، 8 رنز اسکور کیے، جبکہ محمد عباس 2 رنز کے ساتھ ناٹ آؤٹ رہے۔
سری لنکا کی جانب سے لاہیرو کمارا نے عمدہ باؤلنگ کا مظاہرہ کرتے ہوئے 95 رنز کے عوض 5 وکٹیں حاصل کیں۔ اسیتھا فرنینڈو نے 3 کھلاڑیوں کو آؤٹ کیا، جبکہ ملن رتنائیکے اور پربتھ جے سوریا نے ایک، ایک وکٹ حاصل کی۔
واضح رہے کہ اس ٹیسٹ میچ کی پہلی اننگز میں سری لنکن ٹیم پاکستانی باؤلرز کے سامنے مکمل طور پر بے بس دکھائی دی تھی اور پوری ٹیم صرف 98 رنز پر ڈھیر ہوگئی تھی، جس کے نتیجے میں پاکستان کو پہلی اننگز میں 227 رنز کی بھاری برتری حاصل ہوئی۔
دوسرے روز کے اختتام پر پاکستان میچ پر مکمل گرفت رکھتا ہے اور قومی ٹیم تاریخی فتح سے صرف سات وکٹیں دور ہے، تاہم میچ کا فیصلہ ابھی ہونا باقی ہے۔
تیسرے روز سری لنکن ٹیم اپنی دوسری اننگز کا آغاز 73 رنز پر 3 وکٹوں کے نقصان سے کرے گی، جبکہ پاکستان کی نظریں مہمان ٹیم کی باقی سات وکٹیں حاصل کرکے میچ اپنے نام کرنے پر مرکوز ہوں گی۔
راولپنڈی ٹیسٹ کا تیسرا روز دونوں ٹیموں کے لیے انتہائی اہمیت اختیار کر گیا ہے، جہاں پاکستان اپنی برتری کو فیصلہ کن فتح میں تبدیل کرنے کے لیے میدان میں اترے گا، جبکہ سری لنکا کو اننگز کی شکست سے بچنے کے لیے غیر معمولی مزاحمت کرنا ہوگی۔

