حالیہ بارشوں سے متاثرہ خاندانوں کو ریلیف فراہم کرنے اور انفراسٹرکچر کی بحالی کے لیے اقدامات کو ترجیحی بنیادوں پر یقینی بنایا جائے۔محمد سہیل آفریدی

خیبر پختونخوا کے معاونِ خصوصی برائے مواصلات و تعمیرات محمد سہیل آفریدی کی زیر صدارت ضلع خیبر میں حالیہ بارشوں اور سیلاب سے ہونے والے نقصانات کے حوالے سے ایک اہم اجلاس منعقد ہوا۔

پشاور(مہم نیوز)اجلاس میں ڈپٹی کمشنر ضلع خیبر بلال شاھد راو، ایڈیشنل ڈپٹی کمشنرز، اسسٹنٹ کمشنرز، مواصلات و تعمیرات، لوکل گورنمنٹ، آبپاشی، پبلک ہیلتھ انجینئرنگ اور محکمہ تعلیم کے افسران سمیت تمام متعلقہ محکموں کے نمائندے شریک ہوئے۔

اجلاس کے دوران ڈپٹی کمشنر ضلع خیبر نے شرکائ کو تفصیلی بریفنگ دی جس میں نقصانات کے سروے اور جاری ریلیف سرگرمیوں کے حوالے سے آگاہ کیا گیا۔

بریفنگ میں بتایا گیا کہ حالیہ طوفانی بارشوں اور سیلابی ریلوں سے ضلع خیبر کے مختلف علاقوں میں جانی و مالی نقصانات ہوئے ہیں۔ متعدد گھروں کو مکمل اور جزوی نقصان پہنچا، تعلیمی ادارے اور کھیلوں کے میدان متاثر ہوئے، جبکہ مویشی اور دیگر مال مویشیوں کی ہلاکتوں کی بھی اطلاعات ہیں۔

اس کے علاوہ شدید بارشوں کے نتیجے میں لینڈ سلائیڈنگ کے واقعات نے بھی عوامی مشکلات میں اضافہ کیا ہے۔

اجلاس میں اس بات پر تفصیل سے غور کیا گیا کہ متاثرہ خاندانوں کو ریلیف فراہم کرنے اور انفراسٹرکچر کی بحالی کے لیے کن اقدامات کو ترجیحی بنیادوں پر یقینی بنایا جائے۔

متعلقہ محکموں نے اپنی اب تک کی کارکردگی اور آئندہ کے لیے منصوبہ بندی اجلاس میں پیش کی۔معاونِ خصوصی محمد سہیل آفریدی نے اجلاس کے شرکائ سے خطاب کرتے ہوئے کہا کہ حکومت خیبر پختونخوا عوام کو درپیش مشکلات سے بخوبی آگاہ ہے اور متاثرین کو ہر ممکن ریلیف فراہم کرنے کے لیے تمام وسائل بروئے کار لائے جائیں گے۔

انہوں نے کہا کہ میں ضلعی انتظامیہ ضلع خیبر، تمام متعلقہ محکموں، ریسکیو 1122 اور پاکستان تحریک انصاف PK-70 کی ٹیم کے اقدامات کو سرہاتا ہوں جنہوں نے حالیہ بارشوں اور سیلابی ریلوں کے دوران بروقت اور مؤثر اقدامات اٹھائے۔

ان شائ اللہ، میں اور میری ٹیم دن رات ایک کر کے اپنی عوام کے ساتھ کھڑے رہیں گے اور خدمت کا یہ سلسلہ جاری رہے گا۔

محمد سہیل آفریدی نے مزید کہا کہ حکومت کی اولین ترجیح متاثرہ عوام کی بحالی ہے اور اس مقصد کے لیے صوبائی حکومت ضلعی انتظامیہ اور تمام اداروں کے ساتھ مل کر مربوط حکمتِ عملی کے تحت کام کر رہی ہے۔

About The Author

dailymuhim

See author's posts